Пушачите кои успеваат да ги откажат цигарите, се чувствуваат помалку анксиозни потоа, и покрај верувањето дека пушењето го ублажува стресот, открија британските научници...

Тие набљудувале близу 500 пушачи, кои посетуваат клиники за откажување од цигарите, и утврдиле значително намалување на нивото на анксиозност меѓу 68 пушачи шест месеци откако прекинале со цигарите.

Ефектот е поголем кај луѓето кои страдале од анксиозност и лошо расположение, отколку кај оние кои пушеле за задоволство. Истражувачите, претставници на повеќе универзитети, меѓу кои Кембриџ, Оксфорд и Кралскиот колеџ во Лондон, сметаат дека откритието треба да се користи за смирување на пушачите, кои се обидуваат да ги откажат цигарите дека нивната загриженост од зголемување на нивото на анксиозност е неоснована.

Истражувачите сепак нагласуваат дека неуспешниот обид за запирање на цигарите малку го зголемува нивото на анксиозност кај луѓето кои страдаат од проблеми со расположението. Кај оние кои пушат за задоволство, неуспехот не го менува нивото на анксиозност.