Од трансмастите паѓа „добриот“, а скока „лошиот“ холестерол.

Иако трансмасните киселини, одговорни за развојот на атеросклерозата, ја подигнуваат вредноста на „лошиот“ холестерол, се чини дека не влијаат трајно на концентрацијата на шеќер во крвта, утврдија американските научници.

Според истражувањето објавено во списанието American Journal of Clinical Nutrition, концентрацијата на шеќер во крвта и инсулинот кој го регулира шеќерот во крвта не се менуваат без разлика на тоа колку трансмасни киселини луѓето внесат со исхраната.

Трансмасните киселини се наоѓаат во хемиски обработеното растително масло и намирниците од животинско потекло.

Научниците ја споредувале вредноста на шеќер во крвта, инсулин и холестерол кај две групи, од кои едната била на исхрана која вклучува трансмасни киселини, а другата била на палмино и сојно масло.

Утврдено е дека концентрацијата на шеќер во крвта и инсулин не се менувала во двете групи, но кај онаа која била на исхрана на трансмасни киселини паѓал „добриот“, а растел „лошиот“ холестерол.