По претставувањето на iPhone во 2007 година, Apple една година подоцна ја претстави и App Store, апликација за онлајн продавница, која направи вистинска револуција на пазарот на мобилни телефони...



Тоа беше апликација „се на едно место“, која овозможува лесно да најдете и да си купите апликации за телефон од Apple.

По App Store, бројни други компании изработија свои продавници за апликации, така што, освен мобилните платформи (за Андроид, Windows Телефон, BlackBerry), вакви онлајн продавници се достапни и на Windows 8 оперативен систем и последните верзии на оперативниот систем за Mac.

Оваа недела се одбележува пет години од лансирањето на App Store, па од Apple одлучија да ги почестат нивните клиенти. За таа цел, некои од најпопуларните апликации за iPhone и iPad (од кои некои чинат и $ 20) моментално се достапни бесплатно.

„Од 500 апликации кои беа на располагање кога ги лансиравме во 2008г., до над 900 илјади колку што се достапни денес, тоа е одличен период за App Store“, изјавуваат од Apple, и додаваат дека за прославувањето на првата 5-годишнина од онлајн продавницата, овозможија бесплатно симнување на 5 игри и 5 апликации.

Со оглед на тоа што овие апликации ќе бидат достапни бесплатно само за одредено време (на популарната технолошка страница велат дека веројатно ќе бидат достапни за една недела), симнете ги што е можно побрзо и уживајте во некои од најпопуларните игри и апликации за iPhone и iPad.

На корисниците им се бесплатно достапни апликациите Barefoot World Atlas, Day One, How to Cook Everything, One и Traktor DJ (чии цени инаку изнесуваат 20 $) и игрите Badland, Infinity Blade II, Superbrothers: Sword & Sworcery EP, Tiny Wings и Where’s My Water, кои можете да ги најдете и симнете преку App Store или iTunes.