Корисниците на Фејсбук ги прекинуваат пријателствата со луѓе што премногу се фалат и оние што се премногу досадни колку се вљубени...

Многу корисници на Фејсбук имаат по стотици и илјадници пријатели, така што нивните страници се полни со различни информации. Тимот од британскиот веб-сајт „Promotional Codes“ се обиделе да дознаат кои се главните причини  поради кои корисници на Фејсбук ги избришале пријателите од оваа мрежа. Спроведеле истражување во Велика Британија, кое покажува дека токму тие досадни содржини и слики се главната причина зошто се прекинуваат пријателства на Фејсбук.

Најчеста причина за бришење пријатели е премногу фалење, па дури 68% од корисниците признале дека ги избришале пријателите од Фејсбук поради тоа.

Втората најчеста причина за бришење на пријатели во 61% се претераните објави поврзани со романтика и љубов. Ако тие ги сакаат своите партнери, нека им кажат и докажат во живо, а не преку Фејсбук, револтирани биле испитаниците.

Освен сето ова, пријателства се прекинати и поради премногу објавување статуси за локацијата на корисниците, што го правеле на секоја минута, што јаделе, што правеле, и.т.н.

„Фејсбук е одлична алатка за поврзување и споделување информации, но некои луѓе едноставно немаат граници“, изјавил корисник за „Promotional Codes“ и додава дека голем број на луѓе сакаат да привлечат внимание и да им покажат на другите дека „многу“ уживаат во животот. „Вистината е дека, ако нивните животи се толку совршени, тие нема да трошат толку многу време да се фалат на Фејсбук“.