Фејсбук собира телефонски броеви на корисниците на Android без нивно знаење - дури и на оние кои не имаат профил на оваа мрежа...



Откако минатата недела Фејсбук објави дека поради техничка грешка во системот, презеде телефонски броеви и e-mail-ови на над 6 милиони од своите корисници (без нивно знаење), откриен е нов скандал со оваа компанија.

Од безбедносната компанија Symantec објавија дека Фејсбук апликација за паметни телефони која работи на Android на Google, има пропуст поради кој Фејсбук автоматски го испраќа телефонскиот број од уредот на кој е инсталирана, а бројот се испраќа сам со активирањето на апликацијата, уште пред да влезете да го запишете вашето корисничко име и лозинка на оваа социјална мрежа.

На веб-сајтот на Symantec велат дека апликацијата на Фејсбук за Android е инсталирана  на стотици милиони телефони, а повеќето од нив веројатно веќе се загрозени со овој безбедносен пропуст.

Портпаролот на оваа компанија изјави за новинарите на Huffington Post, дека сопствениците на телефонот каде што е инсталирана оваа апликација не мора сами да го дадат својот телефонски број, да се пријават на Фејсбук или дури не мора ниту да имаат отворен профил на оваа мрежа, бидејќи телефонските броеви се испраќаат на серверите на Фејсбук со самото активирање на оваа апликација.

За овој пропуст се информирани од Фејсбук, кои го потврдија неговото постоење, како и дека имаат намера да го решат со претстојната верзија на апликација за Android. Од Фејсбук им се заблагодарија на безбедносните експерти од Symantec за пронаоѓањето на пропустот. Портпаролот на Фејсбук истакнал дека тие не ги искористиле телефонските броеви што им ја испратила апликацијата, туку веднаш ги избришале од нивните сервери.