Роботското возило на американската агенција за вселенско истражување (NASA) насловено како Curiosity, кое се наоѓа во мисија на Марс, моментално работи во „безбедносен мод“ по компјутерската грешка предизвикана од оштетување на фајлови.

Роботот, кој врши анализи на примероци камења на Црвената планета, моментално работи со помош на дополнителен компјутер за поддршка.

Инжењерите на NASA трагаат по можни примероци на оштетени фајлови во меморијата на роботот. Поради оваа грешка роботот привремено се има откажано од работата, додека не биде извршена реконфигурација на помошниот компјутер за да може целосно да ја преземе контролата.

„Се уште сме во рана фаза на процесот. Се надеваме дека за неколку дена ќе успееме да поправиме се и да извршиме реконфигурација“, кажа раководителот на проектот Ричард Кук.

Curiosity е спуштил на површината на Марс на 6 август минатата година со задача со помош на опремата да утврди дали во минатото на оваа планета постоеле услови за микробиолошки живот.