Веста за феноменалниот гест на фудбалерот на Барселона одекнува низ Европа...



Најдобриот поединец во каталонскиот клуб, Лионел Меси, го испратил својот дрес со број 10 на 16-годишното момче Мирко Лорвиќ, кој игра за ФК Бјеловар и страда од леукемија, на кого има потпис и од соиграчите.

Лорвиќ е капитен на кадетската селекција на Бјеловар, а со неговиот талент заслужено го добил прекарот "малиот Меси". Пред неколку месеци му бил дијагностициран рак, но, тој е убеден од оваа тешка борба ќе излезе како победник. По првата операција го фатила сепса, која ја победил со вештачки предизвикана кома.

Лорвиќ добил подароци за поддршка од својот омилен клуб Динамо Загреб и хрватската репрезентација. Младиот фудбалер не го крие фактот дека најомилен дрес му е оној што дошол од Шпанија.

„Овие подароци покажаа дека освен моето семејство и болничкиот персонал, на кои им се заблагодарувам за целото време што го поминаа до мојот кревет, многу непознати луѓе исто така мислат на мене и моето здравје, што особено ме радува. Затоа, на сите добри луѓе им се заблагодарувам и секој збор за поддршка многу ми значи. Но, да не се навреди никој, сепак омилен дрес ми е оној од Меси и пораката да се излекувам што е можно побрзо“, изјавила сестра му на Мирко, која ги пренела неговите зборови.

Инаку сестра му ќе донира коскена срж за операцијата на Мирко кога ќе се создадат услови за тоа.