Првата дама на Америка, Мишел Обама повторно се најде на насловната страна на американскиот магазин "Vogue", кој важи за највлијателното модно списание во светот...

Како што пренесуваат американските медиуми, сопругата на претседателот на САД Барак Обама, се појави на насловната страна на априлското изадание на "Vogue" во син фустан без ракави, креација на Рид Кракоф, нејзиниот моментално омилен дизајнер.

За фотографијата, како и во март 2009 година кога прва пат се појави на кориците на списанието, се погрижи познатата фотографка Ени Либовиц.

"Vogue" носи и интервју со првата дама во кое таа повторно зборува за своите ќерки и сопругот, за кој вели дека го научила да биде "трпелив и смирен".

На прашањето како ја бира облеката, Мишел Обама рекла дека секогаш ја става удобноста пред стилот.

"Секогаш велам дека жената треба да носи облека во која добро се чувствува. Ако се чувствувате добро во облеката која ја носите, полесто ќе стапите во контакт со луѓето и ќе правите и тие да се чувствуваат пријатно во ваше друштво".