Кралицата на американската телевизија одлучи дека малку прстите да ги вмеша и во производството на органска храна и да се обиде на тој начин да се „пресмета“ со дебелоста и незравите навики на Американците и, се разбира, да заработи.

Се разбира дека Опра Винфри нема да сецка органски зеленчук за салата, да готви супи и сокови или да подготвува здрави грицки, но сето тоа ќе се продава под називот Oprah's Organics, вклучувајќи и сапуни, млека за сончање, масло за масажа, фризерски производи - се произведено на растителна база, без „хемија“.

Покрај тоа, Опра побарала барања и за отварање на уште две фирми, Oprah's Farm и Oprah's Harvest, за пијалоци и угостителски услуги во рамки на својот бренд Harpo Inc.

Опра веќе поседува стотина хектари земја на која веќе постојат фарми, а органската храна со нејзин потпис прво ќе им биде достапна на купувачите на Хавајските острови.

Опра Винфри и оваа година се најде на врвот на листата на најплатени славни личности на списанието Forbes со заработка од 165 милиони долари.

А колку ќе заработи од пиперките, доматите, зелките, компирите... ќе знаеме веќе во почетокот на наредната година кога би требало во продавниците да се појават првите производи од славната водителка и актерка.