Во Лос Анџелес е одржана забава за збогување по повод завршување на снимањето на серијата „Доктор Хаус“.

На забавата присуствуваа ѕвездата на серијата, Хју Лори, неговите колеги и стажистите кои во текот на осум години ја трпеле незгодната нарав на брилијатниот лекар и му помагаа да реши некои од „нерешивите“ медицински случаи.

„Не се снаоѓам на разделбите“, рече Лори. „Не знам да кажам збогум... до душа, не знам ни ‘добар ден’ да кажам како што треба... тешко е да се збогуваш од 300 луѓе со кои си работел осум години. Ова е многу емоционален момент.“

Британецот Хју Лори играјќи го Хаус стана популарен ширум Америка, заработи шест Еми номинации, два пати освои Златен глобус и стана најплатен телевизиски актер во САД со 700.000 долари од епизода.