Лига на Шампиони Екипата на Лион успеа да одигра нерешено на Сантијаго Бернабе и да го елиминира големиот Реал Мадрид од Лигата на Шампионите
Завршија надежите на Кралскиот Клуб дека ќе може да стигнат до јубилејната 10 титула во Лигата на Шампионите на својот Сантијаго Бернабе.
Шеста година во низа, Реал Мадрид не успеава да го помине осмина-финалето и пречката оваа година повторно се викаше Лион.
Тимот од Франција успеа да одигра 1-1 на Сантијаго Бернабе и да направи големо изненадување во овогодинешното издание на нок-аут фазата од Лигата на Шампионите.
Но стартот на натпреварот навестуваше нешто сосема друго. Кака по само 16 секунди можеше да го отвори резултатот но Хуго Лорис интервенираше одлично.
Кралевите дојдоа во водство веќе во шестата минута откако Гути испрати одлична долга топка кон Роналдо и Португалецот со прецизен удар успеа да го совлада голманот на Лион.
Во 10та минута Кака повторно се закани со удар од работ на шеснаесетникот но Лори успеа да го скроти ударот.
Роналдо имаше нова шанса за погодок но по изведениот корнер биеше со глава само над голот на Лион.
Во 25та минута Реал креираше нова 100% шанса, Игуаин успеа да се ослбоди од Лори но ударот на напаѓачот заврши само во стативата.
Аргентинецот неколку минути подоцна пропушти уште една голема шанса откако се најде осамен пред Лори, но голманот на Лион успеа да го одбрани ударот на напаѓачот.
Првата посериозна шанса гостите ја имаа дури во 35та минута кога стрелецот на првиот натпревар, Макун се закани по голот на Касиљас.
И покрај големиот број на шанси, Реал Мадрид на полувреме замина само со предност од 1-0 и Кралевите мораа да постигнат уште еден погодок за пласман во следната рунда.
Но на стартот од вторито дел, Лион направи две промени, Калстром и Гоналонс влегоа во игра на местото на Макун и Бумсонг.
Гостите од Франција заиграа похрабро и поофанзивно и почнаа да му создаваат проблеми на Реал.
Во 52та минута Сидни Гову од добра позиција шутираше многу непрецизно и над голот на Касиљас.
Три минути подоцна Лисандро испрати вистинска бомба од 30 метри која Касиљас успеа да ја одбрани.
На спротивната страна, Кака и Гранеро се заканија со удари од далечина но двајцата беа многу непрецизни во своите обиди.
На 15 минути до крајот на натпреварот Лион конечно стави крај на амбициите на Реал Мадрид за 10 титула во Лигата на Шампионите.
Пјанич доби одлична повратна топка од Лисандро во срцето на шеснаесетникот на Реал и интернационалецот од БиХ со полу-волеј успеа да го совлада Касиљас.
На Реал Мадрид му беа потребни два погодока за пласман во следната фаза и избраниците на Пелегрини нападнаа со сите сили.
Тоа остави многу простор за Лион во контра нападите и гостите можат да жалат што не победија на Бернабе откако Лисандро Лопез и Делгадо промашија две големи шанси.
Powered by: 24 FUDBAL.com.mk
