Бившиот дечко на американската пејачка, кој ги продуцирал и напишал некои од нејзините големи хитови, бара 35 милиони долари...
Во љубовта нема граница, но во бизнисот има. А кога и двете се испреплетени, целата работа најчесто завршува на суд. Тоа најдобро го знае Лејди Гага, која овие денови е тужена од страна на Роб Фусари, нејзиниот композитор, продуцент и екс-дечко.
Во судскиот документ, кој адвокатот на Фусари го доставил вчера на судот во Њујорк, стои дека приказната помеѓу продуцентот и тогашната анонимна пејачка Стефани Германота започнала пред четири години, кога Гага тропнала на вратата на Фусари со желба да сними рок албум.
Фусари сватил дека нејзиниот потенцијал не е за рок поради бучавата на гитарските рифови, но нејзините авторски песни ги сметал за исклучително влијателни песни. Тогаш како што пренесува CNN започнал процесот на трансформирање на иднината на Лејди Гага.
Роб Фусари тврди дека тој е авторот на имињата на нејзиното алтер его, и дека со пејачката и нејзиниот татко потпишал договор, според кој требало да му стигаат по 20% од заработувачката со Лејди Гага.
Но, љубовта во меѓувреме пукнала, Лејди Гага потпишала договори со издавачката куќа Interscope, а на Фусари ниту му се јавувала, ниту му го исплаќала неговиот процент. Ќе сака ли сега да плати дури 35 милиони долари, колку што бара Фусари, но за тоа ќе одлучи судот.
